Ермаханның ерлігі

«QazaqGaz Aimaq» АҚ апаттық-диспетчерлік қызметінің слесарі Ермахан Манқараев Шымкент қаласында екі кішкентай баласы бар отбасын көмірқышқыл газынан уланудан аман алып қалған болатын, деп хабарлады Шымкент қаласының өңірлік коммуникациялар қызметі.

Оқиғаға туралы айтатын болсақ, Ермахан көпқабатты үйдің газ құрылғысын тексеру барысында пәтерлердің бірінен әлсіз дауыстар естиді. Бірақ тұрғындар есік ашпаған.

Бұдан әрі, жалдамалы пәтер иесі өз кілтімен есікті ашып, үй ішінде ес-түссіз жатқан жанұяны көреді. Пәтерді Астанадан қыдырып келген Жүнісовтер жалдап тұрған екен. Бірақ сол пәтердің газ құрылғысы істен шығып, қос балақай мен ата - анасы улы газға тұншығып қалған. Оқиға орнында болған Ермахан бірден газ құрылғыларын өшіріп, терезелерді ашып, жедел жәрдем шақырады және алғашқы медициналық көмек көрсете бастайды.

Дәрігерлердің айтуынша, отбасы көмірқышқыл газынан қатты уланып, ауруханаға түскен. Слесарь маманның алғашқы дәрігерлік көмек көрсетудегі сауатты әрекетінің арқасында, Астанадан қыдырып келіп, ажал құша жаздаған отбасы аман қалды.

Медициналық көмек көрсетуді Ермахан жұмыста үйренген. Өйткені QazaqGazAimaq-тың барлық қызметкерлері мұндай оқу-жаттығулардан міндетті түрде өтеді.

Дегенмен, дер кезінде, сауатты көмек көрсету бір отбасын ажалдан арашалап қалды. Бұл дегенің Ермаханның өз жұмысына және оқыту-жаттығуларға деген жауапкершілігін көрсетеді.